One  - షార్ట్ ఫిలిం రివ్యూ : 

షార్ట్ మూవీస్ కోసం  రివ్యూలు రాయవచ్చా లేదా అన్న విషయాన్ని పక్కన పెడితే  , చిత్త శుద్ధితో  సినిమా మీద  ఉన్న ప్రేమ తో , ఖాళీ లేని ఈ బిజీ రోజుల్లో ఎంతో ఓర్పుతో  ఈ సినిమా ను తీసిన ఆ  టీము కు హృదయ పూర్వకమైన  వందనాలు . టాటా సుమో లు గాల్లో పేలిపోవటాలు, వంశాల కోసం  సెల్ఫ్ డబ్బాలు , కోట్ల బడ్జెట్ తో తీసి చివరకు నాలుగు రోజులకే డిస్ట్రి బ్యుటర్లను ముష్టి వాళ్ళు గా మార్చే  పెద్ద సినిమాల కన్నా ఈ సినిమా ఎన్నో రకాలుగా మేలు . 
లోట్లు వెతకాలంటే  వెయ్యి ఉండొచ్చు . రంద్రాన్వేషణ మానేసి ప్రయత్నాన్ని అభినందిస్తే  మంచి సినిమాలు తీయాలనే ఒక తపను ప్రోత్సహించే వాళ్ళలో మనమూ ఒకరం అవుతాం .

ఈ సినిమా కధను నేను ఇక్కడ ప్రస్తావించ దలచుకోలేదు . దయచేసి youtube లో 5 భాగాలను చూడండి .
link :  http://youtu.be/0laHGh8JW2o .  
మంచి ఆడియో సిస్టం పెట్టుకుని చూస్తే  మీకు మంచి సినిమా చూసిన ఫీలింగ్  గారంటీ . మనం స్టార్ హోటల్ కు వెళ్ళబోయి ఏదో కారణంతో పక్కనే ఉన్న కాకా హోటల్ కు వెళ్ళితే , అక్కడ స్టార్ హోటల్ కన్నా మంచి భోజనం ( రుచి కరమైన ) దొరుకుతుంది . అనుకోకుండా ఇలాంటి సినిమాలు చూస్తే ( షార్ట్ ఫిలిం అయినా సినిమాలకు ఎక్కడా తీసిపోలేదు ) అలాంటి ఫీలింగ్ కలుగుతుంది .

ఇందులో ముఖ్యముగా ప్రశంసించవలసిన వలసిన వ్యక్తులు నలుగురు . ఒకరు  కామెర మాన్ విక్టర్ . రెండవది మ్యూజిక్ ఇచిన శ్రవణ్. మూడవది  క్రాంతి కుమార్ - చాలా చక్కగా డైరెక్షన్  చేసారు . మంచి ఎతుగడ ఉన్న కధను ఎన్నుకోవటం ఒక ఎత్తు , పరిమితమైన వనరులతో  దానిని తెరకు ఎక్కించటం ఇంకో ఎత్తు . ఇక నాల్గవది  రఘు . ఒక్క డైలాగ్ మాడ్యులేషన్  తప్ప నటనా పరంగా చాలా చక్కటి ప్రతిభ చూపించాడు . చాల నాచురల్ గా ఇతనికి సీన్లు సరిపోయినట్లు  అనిపించింది . స్నేహితులిగా చేసిన వారిలో  ఎవరినీ పాయింట్ అవుట్ చెయ్యలేము . పాత్రల పరిధి మేరకు  చాలా చక్కగా నటించారు . ముఖ్యముగా పార్ట్ 4 లో వచ్చే చేతబడి సీన్ లో  రఘు నటన అధ్బుతం .

విక్టర్ కేమెర  చాలా  ఆహ్లాదంగా ఉంది . కంటికి ఇంపుగా ఫ్రేం  సెట్ చెయ్యటం  దర్శకుడి  సృజనాత్మకతకు అద్దం పడుతోంది . శ్రవణ్ అందించిన సంగీతం  , ఒక పాట  సరిగ్గా అతికినట్లు సరిపోయాయి .   వనరులు పరిమితంగా ఉండటం వలన  కాలేజ్ కాంపస్ ను  పూర్తి గ , విద్యార్ధులతో నిండుగా చూపించలేకపోయారు . హీరోయిన్  చాలా ఫ్రెష్ గా , అందముగా ఉంది . చక్కగా నటించింది కూడా . అసందర్భముగా ప్రవేశించి  తరువాత కనిపించకుండా పోవటమే కాక  కధలో తన పాత్ర పరిమితం . అసలు అవసరం లేదు కూడా అని నా అభిప్రాయము .  మరీ సీరియస్ గా ఉండకుండా  కొంచం రిలాక్స్  గా ఉండటం కోసం దర్శకుడు హీరోయిన్ ను జోప్పించాడని నా అభిప్రాయము .

చాలా  స్వల్ప వనరులతో తీసిన ఈ సినిమాలో లోటు పాతులను వెతకటం మూర్ఖత్వం అని తెలిసినప్పటికీ , మంచి ప్రయత్నంలో  చిన్న పొరపాట్లను ఎత్తి చూపిస్తే  రాబోయే  ప్రయత్నాలలో వాటిని సరిచేసుకుంటా రన్న ఆశతో చెప్పటం జరిగింది .

ఒకటి మాత్రం నిజం.  బాబులు , దత్తులు , కత్తులు , బిల్డ్ అప్ లు , బొడ్లు, తొడల తో నిండి ఉన్న  తెలుగు చిత్ర సీమలో ఎవరైనా అభిరుచి ఉన్న నిర్మాత  ఈ టీం కు ఒక్క అవకాశమిస్తే  .. మన తెలుగు ప్రేక్షకులకు వీళ్ళు ఒక మంచి సినిమా ను అందిస్తారనే నమ్మకం నాకుంది ... సినిమా చూసి మీకనిపిస్తే  ఇంకొక పది మందికి చెప్పండి . కొత్త వాళ్ళ ప్రతిభను  ప్రోత్సహిస్తే మనకు  చివరకు మిగిలేది   మంచి  తెలుగు సినిమా కాబట్టి  ఈ ప్రయత్నాన్ని  మరొక్కసారి మనస్పూర్తిగా అభినందిస్తూ , రఘు కు మంచి భవిష్యత్తు కలగాలని కోరుకుంటూ ..సెలవు

రచ్చ 

 

 

 

 

 

 

 హెచ్చరిక : మీరు  గుండె జబ్బులు  ఉన్నవారైతే , మీకు నరాల బలహీనత ఉన్నట్లయితే , మీరు గర్భంతో ఉన్నా  మీరు   బలహీన మనస్కులైనా , ఈ సినిమా చూడవద్దు .  

అభ్యర్ధన :  మీరు  మెగా ఫ్యామిలీ ను , వారి వంశాన్ని ( దీనెమ్మ జీవితం .. ఇది నా మనసులో అనుకుంటున్నాను అని మీరు అర్ధం చెసుకొనగలరు )  ప్రేమించే , అభిమానించే  వారైతే  దయచేసి ఈ రివ్యూ చదివి నన్ను               బూతులు తిట్టడం కాని , పరువు నష్టం దావా వెయ్యటం కాని చెయ్యవద్దని  నా ప్రార్ధన .

సంపత్ నంది  డైరెక్టర్ గా తీసిన  ఈ చిత్ర రాజము , ఒక కలికితు రాయి . ఆడియో ఫంక్షన్ చూసి ఇదేదో  యాక్షన్  సినిమా అని వెళ్తే ..ఆశ్చర్య కరముగా   ఇది  కొన్ని పాత సినిమాలు కలిపి తీసిన కలగూర గంప కధను కలిగిఉన్న  ఒక భయానక చిత్రము . ( హార్రర్ మూవీ ).

ఇక కధ ను అవలోకించి నట్లైన చో : రాం చరణ్ తేజ అనబడు ఒక  బస్తీ కుర్రవాడు , తన పేదరికము వలన  ఎల్లప్పుడూ  pepe jeans , Lee , UCB  బట్టలు వేసుకుంటూ , మంచి మంచి విదేశీ బైకుల పైన తిరుగుతూ , వాళ్ళ పెంపుడు తల్లి తండ్రితో , ఒక విశాలమైన  cane furniture గల ఒక బీద ఇంట్లో నివసిస్తూ ఉంటాడు . ఇతను  మొత్తం సిటీ లో జరిగే  ఎలాంటి పందెము నైనను జయించగల సమర్ధుడు . 10 ,000 కోట్ల ఆస్తికి వారసురాలైన  తమన్నా గారిని ఈయన గారు ప్రేమించి , వలలో పడేస్తే 20 లక్షల బెట్టింగ్ డబ్బులు వస్తాయి . దానితో తన పెంపుడు తండ్రి  ఆరోగ్యాన్ని బాగుచేయించి చరిత్ర పుటలో స్థానం సంపాదించాలని అనుకుంటాడు . నాకు అర్ధం కానిదేమిటంటే  నిజంగా ప్రేమించి  అలాంటి పిల్లను పడేస్తే  ముష్టి 20 లక్షలు ఎందుకు  దర్జాగా 10000 కోట్లు ఇతనివే అవుతాయి కదా ... మరి  శ్రీ సంపత్ నంది గారు గాని, శ్రీ చిరంజీవి గారు గాని కధా చర్చలలో ఈ విషయాన్ని ఎందుకు మర్చిపోయారు ? అలాగే శ్రీ సంపత్ నంది గారు .. బస్తీ కుర్రవాళ్ళు ఎలా ఉంటారో తెలుసుకోవాలంటే మీరు కొంచం మీ దగ్గరలో ఉన్న బస్తీలకు వెళ్ళండి సార్ .. ఇంత  ఖరీదైన బస్తీ కుర్రవాళ్లను మేము తట్టుకోలేకపోతున్నాము .

సదరు తమన్నా గారు కూడా పెంపుడు కూతురు . ఆమె ఆస్తి ని కొట్టేయ్యాలని ముకేష్ రుషి గారు జాగ్రతగా ఆమెను 18  ఏళ్ళు కాపాడితే మన హీరో గారు ఆమెను వీజీగా  లైన్ లో పడేసి  20 లక్షలు పట్టుకెళ్ళి పోదామని  మంచి క్యారీ బాగ్ ను రెడీ చేసుకుంటారు . ఈలోగా హీరోయిన్ గారు , ఇదంతా తూచ్ ... నేనే కావాలని నీ ప్రేమలో పడిపోయాను అని చెప్తారు . తరువాత చూస్తే హీరో కు హీరోయిన్ కు  ఒకరే అన్యాయం చేసారన్న నిజం తెలుస్తుంది . ఇక హీరో గారు  అందరిని చంపి ప్రతీకారం తీర్చుకుంటారు . అదే ఈ చిత్ర రాజము యొక్క  చారిత్రాత్మకమైన కధ.

మొత్తం సినిమా అంతా  పాత చిరంజీవి సినిమాలు అంటే 80 , 90 లలో వచ్చినవి చూసినట్లే ఉంది . అయ్యా పరుచూరి బ్రదర్సూ , ఇంకా డబుల్ మీనింగ్  సంభాషణలు , హీరో విలన్లు  ఒకరికి ఒకరు సవాళ్లు విసురుకోవటం , వంశాల కోసం , ఫ్యామిలీ ల కోసం , వాళ్ళు మమ్మల్ని ఉద్దరించిన విషయాల కోసం మీరు రాయటం ఆపేసి  దయచేసి  ఏదైనా  పార్టీ లో జాయిన్ అయిపోండి సార్... ఈ హింస భరించ లేకపోతున్నాం . సినిమా లో పాటలు ఎందుకు వస్తున్నాయో ఎవడికి అర్ధం కావటం లేదు .  సినిమా మొత్తం రామ్ చరణ్ గారు మెడలో వేసుకున్న ఆంజనేయుడి  లాకెట్  తమన్నా గారికి కనపడదు ..  అవసరమైనప్పుడే అది కనిపిస్తుంది ...  

ఇక హీరో గారు అందంగా ఉన్నారని సినిమా లో ఉన్న అన్ని పాత్రలతో  చెప్పించి, అది చాలదన్నట్లు ఆడియో ఫంక్షన్ లలో, టీవీ  ప్రోమో లలో కూడా చెప్పించారు . ఇదంతా అతను అందముగా ఉన్నారని మనల్ని ఒప్పుకోమని మెంటల్ గా ట్యూన్ చేస్తున్నట్లా? లేక బ్లాక్ మెయిల్ చేస్తున్నట్లా ? అయ్యా ? తెలుగు ప్రేక్షకులు  బాగా విశాల హృదయులు . ఎలాంటి వారైన  వారసులు అయితే ఒప్పుకుంటారు ... మా తల రాత అలా ఉన్నప్పుడు మీరు కష్టపడటం దేనికి ? మేము ఒప్పుకున్తున్నాం ..రామ్ చరణ్ గారు చాల అందముగా ఉన్నారు .

ఇక చివరిగా ఈ సినిమా ఇండస్ట్రీ రికార్డ్లు తిరగ రాసిందనీ , అత్యదిక వసూళ్లు చేసిందనీ , సూపర్ డూపర్ హిట్ అనీ టీవీ లలో చెప్తుంటీ చూసాను . . ఇలాంటి చిత్ర విచిత్రాలు మా జీవితాలలో అలవాటైపోయినందున , దీనిని  సీరియస్ గా తీసుకుని ఈ రికార్డులు  అన్ని కరెక్టేనా కాదా అని వాకబు చేసే తీరుబడి ఎవరికీ లేదు . మేమంతా  ఆధార కార్డ్లు  రాలేదనీ , గ్యాస్, పెట్రోల్ ధరలు ఎంత పెరుగుతాయో అన్న భయంతో చస్తున్నాం . సో మీరు హ్యాపీ గా ఇలాంటి సినిమాలు తీసి మా పైన వదలండి . రికార్డులు బద్దలు గొట్టండి . మేము చూసి తరిస్తుంటాం 

సర్వేజనా సుఖినోభవంతు ..

P .S : పైన పేర్కొన్న అభిప్రాయము  నా వ్యక్తిగతమైనది . ఎవరిని కించపరచాలని  గాని, వెక్కిరించాలని కాని రాసినది కాదు . రాజ్యాంగము నాకు ప్రసాదించిన భావ ప్రకటన హక్కు ను వాడుకుని  , నా భావమును ప్రకటించ డమైనది . నమస్కారం

 

3 - Movie review ( My take)

3 - రివ్యూ 

దేశాన్ని , ఇంకా చెప్పాలంటే ప్రపంచాన్ని ఒక ఊపు ఊపిన  కొలవెరి పాట తో కావలసిన దానికన్నా ఎక్కువ ప్రచారం పొందిన ఈ సినిమా ... ధనుష్ , శ్రుతి హసన్  సినిమా జీవితంలో ఒక గుర్తు పెట్టుకోదగ్గ సినిమా ....

క్లుప్త్జంగా కధ చెప్పుకోవాలంటే : ఇంటర్మీడియట్ లో మొదలైన ప్రేమకధ . చూపులు , కలుసుకోవటం , ఊసులు , బాసలు , విరహం , ప్రేమ , కామం  అన్నింటికీ  ఫుల్ స్టాప్ పెట్టేటట్లు  పెళ్లి , పెళ్లి తరువాత కొత్త జీవితం . జీవితంలో ఓక్ కొత్త మలుపు . షాక్ ... అంతే .. 3  అంటే ముగ్గురు కారెక్టర్ లు . ధనుష్ ఒకటి, శ్రుతి ఒకటి , మరి మూడవ  కారెక్టర్ ను సస్పెన్సు , షాక్ ను మిళితం చేసి జొప్పించారు సినిమా లో ...

నాకు రెండు ఆశ్చర్యాలు   కలిగాయి సినిమా చూస్తుంటే .. ఈ సినిమా కధను ఎలా చెప్పి  ఆర్టిస్ట్ లను కన్విన్సు చేసి ఉంటారా అని ఒకటి, దానిని అర్ధం చేసుకుని ఆర్టిస్ట్లు ఎలా నటించారా అని ఒకటి . రజినీకాంత్ లాంటి సూపర్ స్టార్ ఇంట్లో పుట్టిన ఒక అమ్మాయి  మామూలు మిడిల్ క్లాసు అమ్మాయిల  మనోభావాలను తెరకు ఎక్కించటం లో వందకు వంద మార్కులు కొట్టేసింది . శ్రుతి హసన్  అభినయానికి జోహార్లు . కమలహాసన్ లా కాకుండా మోహన్ లాల్  లా చిన్న చిన్న విషయాలను , చాల అందంగా చూపించింది తన నటనలో. 

కధ చిన్నదే , కాని దానిని తెరమీద చూపించిన విధానం గాని, ప్రేక్షకుడి ని ఏదో ఒక పాయింట్ దగ్గర తనను తాను చూసుకునేటట్లు చేయడంలో కాని దర్శకురాలు  విజయం సాధించింది . ధనుష్ కు ఇలాంటి పాత్రలు కొట్టిన పిండి . నేనేమైన చెప్తే తిరుపతి లడ్డు కోసం  చందు స్వీట్స్ వాడు కామెంట్ చేసినట్లు ఉంటుంది .

ఏదో మన పక్కింట్లో జరుగుతున్నట్లు గా ఈ సినిమా ఫస్ట్ హాఫ్ ఉంటుంది, సెకండ్ హాఫ్ కొంచం స్లో అయినా ..మనసుకు హత్తుకుంది . 

ఈ సినిమా కు మ్యూజిక్ ఇచిన అనిరుద్ కు  వెయ్యి మార్కులు. నేపధ్య సంగీతం ఇళయరాజా ను  గుర్తుకు తెస్తే , పాటలు ( కొలవెరి మినహా ) అన్ని కొత్తగా అనిపించాయి .  కధలో ధనుష్ ఫ్రెండ్ గా నటించిన  అబ్బాయి సూపర్ . ఎక్కడా అశ్లీలత కాని , అనవసరమైన ఓవర్ ఆక్షన్ లు కాని లేవు. 

ఈ సినిమా  2 వారాలు ఆంధ్ర ప్రదేశ్ లో ఆడితే  తెలుగు ప్రేక్షకులు  దీనిని ఆదరించినట్లు లెక్క. 

మంచి సినిమా చూడాలని అనుకుంటే ఈ సినిమా కు వెళ్ళొచ్చు . అంతే కానీ  మీకు  తొడలు చూపించే  అమ్మాయిలు, ఫారిన్ లొకేషన్ లు,  వాంతులు చేసుకున్నట్లు  అరిచే విల్లన్ లు, మూలసంక ఉన్నట్లు అరిచే హీరోలు , బిల్డప్  డైలాగులు, వారసత్వ ఖ్యాతి ని వివరించే ఊకదంపుడు ఉపన్యాసాలు , బకెట్ ల కొద్దీ రక్తం కావాలంటే మాత్రం ఈ సినిమా కు దయచేసి వెళ్లొద్దు . 

ఈ సినిమా లో ఫీల్ ఉంది, మంచి నటన ఉంది , మంచి సంగీతం ఉంది , తక్కువ డబ్బులతో , పరిమిత వనరులతో తీసిన ఈ సినిమా నా దృష్టిలో  ఎన్నో  సినిమా ల మీద మంచి సినిమా . ఇది  నా అభిప్రాయము . 

సర్వేజన సుఖినోభవంతు 

NIPPU - REVIEW

నిప్పు  - రివ్యూ


గుణశేఖర్ తీయాలనుకున్న కధ ( నా చిన్న బుర్రకు తట్టినది , నేను అర్ధం చేసుకుని , ఊహించుకున్నది )


రాజా గౌడ్  హైదరాబాదు  ను శాసించే ఒక పెద్ద రౌడీ . అతనికి ఒక భార్య . ఇద్దరు కూతుళ్ళు . పెద్దమ్మాయి దుబాయి లో ఉద్యోగం చేస్తుంది . చిన్నమ్మాయికి ఒక కాలు అవిటి .  భార్య చాల గయ్యాళి . పెద్దమ్మాయి  దుబాయిలో శ్రీరాం అనే వ్యక్తి తో ప్రేమలో పడుతుంది . ఒక సాయంత్రం ఇద్దరూ ఒక 21 అంతస్తుల భవనం మీద రొమాంటిక్ గా సరదాగా గడుపుతుండగా ప్రమాదవసాత్తూ  ఆ అమ్మాయి  పై నుండి పడిపోయి చనిపోతుంది . కానీ ఆ అమ్మాయిది ప్రమాదవశాత్తూ  జరిగిన మరణం కాదని , శ్రీరాం ఆ అమ్మాయిని చంపేసాడని దుబాయి కోర్ట్ నమ్మి , అతనికి ఉరిశిక్ష వేస్తుంది . శ్రీరాం కు  ఒక మంచి ఫ్యామిలీ ఉంది ఇండియా లో . ఈ విషయం వాళ్ళ ఫ్యామిలీ కు తెలీదు . శ్రీరాం కు ప్రాణ స్నేహితుడైన  సూర్య ( రవితేజ ) స్నేహితుడి పుట్టినరోజు కోసం దుబాయి వెళితే  ఈ విషయం తెలుస్తుంది . మరి శ్రీరాం ను రక్షిచుకోవటం ఎలా  అని ప్రయత్నిస్తున్న సూర్య కు , చనిపోయిన అమ్మాయి తల్లితండ్రులు  క్షమాబిక్ష పత్రం పై సంతకం పెడితే శ్రీరాం శిక్ష రద్దు అవుతుంది అని తెలుస్తుంది . సో సూర్య ఆ భాద్యతను భుజాల  మీద వేసుకుని ఇండియా వస్తాడు ....


అసలు  సూర్య ఎవరు అంటే .. శ్రీరాం కు ఫ్రెండ్ , శ్రీరాం చిన్న చెల్లెలను( దీక్ష సెత్ ) ప్రేమిస్తుంటాడు . హైదరాబాద్ లో ఒక ఫిట్ నెస్  సెంటర్ నడుపుతుంటాడు . కష్టాల్లో ఉన్న వారిని తన కండబలంతో, మంచితనంతో ఆదుకుంటూ ఉంటాడు . ఈ క్రమంలో ఒక సారి రాజా గౌడ్ తో తలపడి , అతని సామ్రాజ్యాన్ని, అతని వ్యాపారాన్ని  కూలగొట్టి రాజా గౌడ్ కు ప్రధాన శత్రువు అవుతాడు . ఇప్పుడు అదే రాజ గౌడ్ దగ్గరకు వెళ్లి తన స్నేహితుడి ప్రాణాల్ని కాపాడమని అడగాల్సిన పరిస్థితి . కాని రాజ గౌడ్ కోరుకునేది సూర్య చావుని . ఈ పరిస్థుతలను సూర్య ఎలా తట్టుకుని అధిగమించి తన స్నేహితుడి ప్రాణాలు కాపాడి, తన ప్రేయసిని దక్కించుకున్నాడు అన్నదే కధ ....


కధను చదివారు కదా .. ఈ కధను గుణశేఖర్ ఎలా తెర మీద చూపించాడో  ఇప్పుడు చూద్దాం :


సినిమా మొదలైంది ... పేర్లు వేసారు ... ముగ్గురు  పేరుమోసిన రౌడీలు వచ్చి ఒక బిల్దర్ కు మామూలు అడిగారు . కట్ చేస్తే  హీరో ఎంట్రీ ... 8  ట్రాన్స్ ఫార్మర్లు  పేలిపోయాయి ... 29 సుమో లు  గాల్లోకి లేచిపోయాయి .. దాదాపు 200 మంది కాళ్ళు చేతులు విరగ్గొట్టుకున్నారు.. హీరో అసలు బండి దిగలేదు .. చొక్కా నలగలేదు ... క్రాఫ్ చెదరలేదు ... ఫైటు అయిపోగానే  హీరో గారు  పూర్తిగా తడిగా , నీళ్ళు నిండి ఉన్న సెల్లార్ల లో బాగా ట్యూబ్ లైట్ లు వెలిగించి .. వాటిమధ్య  తన ప్రతాపాన్ని వర్ణిస్తూ ఒక పాత పాడాడు .. మధ్య మధ్య లో చలి జ్వరం వచినట్లు వణికిపోతూ డాన్సు చేసాడు ...  తరువాత విలన్ వచ్చాడు .. పైల్స్ కు బ్రాండ్ అంబాసిడర్ లాగ అరుస్తూ కాసేపు మాట్లాడాడు .. వెంటనే హీరోయిన్ వచ్చి బొడ్డును , తొడలను చూపిస్తూ ఎక్సర్ సైజులు  చేసింది .. ఆ తర్వాత  హీరో దుబాయ్ వెళ్ళాడు .. పదిరోజుల తరువాత వచ్చాడు .. పెద్ద ఫైటు .. వెంటనే  లండన్ వెళ్లి ఒక పాట పాడాడు. వెనకాతల  రష్యన్ అమ్మాయిలు  " తుర్ర్ర్రర్ ...పుర్ర్ర్ర్ ..గుర్ర్ర్ " అంటూ మధ్య మధ్యలో అరిచారు . హాల్లో నుంచి చాల మంది జనం బయటకు వెళ్లారు . సమోసా లు బాగా అమ్ముడు పోయాయి బయట . పాట  అయిపొయింది . విలన్ కు మళ్లీ పైల్సు వచ్చాయి . రాజేంద్ర ప్రసాద్ హీరో ను తిట్టాడు . హీరో ఫైటు చేసాడు .. ఇంటర్వల్ ... నేను బయటకు వచ్చాను ... చాల మంది ముఖాల్లో స్టాక్ మార్కెట్ లో డబ్బులు పోగుట్టుకున్న ఫీలింగ్ కనిపించింది ( నా భ్రమా ? )  


మళ్లీ సినిమా స్టార్ట్ అయింది . హీరో హీరోయిన్ ను బయటకు తీసుకువెళ్తాను అని చెప్పి బయటకు తీసుకు వచ్చాడు. ఇద్దరూ పాట మొదలెట్టారు .. హాల్లో జనం లో 85 % బయటకు వెళ్ళిపోయారు .. హీరో పెద్ద ఫైటు చేసాడు ... ఆ క్రమంలో సూపర్ మాన్, హి మాన్ , spyderman  అందరినీ మించే అధ్బుత సాహసాలు చేసాడు ... కాసేపటకి హీరోయిన్ కు నిజం చెప్పాడు ( ఏంటి అని నన్ను అడగొద్దు ప్లీజ్ ) .. హీరోయిన్ ఏడుస్తుంది ... నాకు వాంతి వస్తున్నట్లు ఒక ఫీలింగ్ కలిగింది .. ఈ లోగ బ్రహ్మానందం వచ్చి కామెడీ అన్న పేరుతో కాసేపు వికారంగా ప్రవర్తించి వెళ్ళిపోయాడు ...( మీరు కొంచం రోజులు రెస్ట్ తీస్కోండి సార్ ) వెంటనే హీరోయిన్ జాతీయ స్థాయిలో  అథ్లెటిక్  చాంపియన్ అయిపొయింది ,, ఆ ఆనంద భాష్పాల మధ్య ఒక పాట పాడుకున్నారు .. హీరో ఫైటు చేసాడు ... వెంటనే ఫ్యామిలీ సాంగ్ స్టార్ట్ అయింది ... అందులో  328 బొడ్లను, క్లోజ్ అప్ లో చూపించారు . ( భగవంతుడా ).. వెంటనే విలన్ వచ్చి  రాజేంద్ర ప్రసాద్  ఫ్యామిలీ ను కిడ్నాప్ చేయడానికి ప్రయత్నించాడు ... విలన్ కు శత్రువు వచ్చి విలన్ మీద ఎటాక్ చేసాడు ... హీరో రాజేంద్ర ప్రసాద్ ఫ్యామిలీ ను  రక్షించి విలన్ ను కూడా కాపాడాడు ... ఈ లోగా హీరో ఫ్రెండ్ దుబాయి నుంచి  హైదరాబాద్ వచ్చాడు ... విలన్ వచ్చి హీరో ఫ్రెండ్ ను కిడ్నాప్ చేసాడు ... హీరో వెళ్లి ఫైటు చేసాడు ...  విలన్ మారిపోయి అందర్నీ ఆశీర్వదించాడు ... నాకు గుండెలలో ఎవరో గునపం దించినట్లు అనిపించింది .. హాల్ నుంచి బయటకు వచ్చాను ... ఇంటికెళ్ళి  మిరియాల కషాయం తాగి  పడుకున్నాను ... శుభం..


ఇందులో రివ్యూ కావాలని మీకు అనిపిస్తే  పైన చెప్పిన కధను  కింద చెప్పిన సీన్లకు  అతికించుకుని ఊహించుకోగలరు ...  ఒక్క ముక్కలో చెప్పాలంటే "నిప్పు " ఒక సినిమా కాదు ... ఒక ఆయుధం ...ఒక శక్తి..
ఒక మందు ..... సర్వరోగ నివారణి.. రెండు సార్లు ఈ సినిమా ను  చూస్తే కరుడుగట్టిన తీవ్ర వాది కూడా నిజాలు చెప్పి , లొంగిపోవటం ఖాయం ... దీనిని ఇండియన్ మిలిటరీ  సైనికులకు  చూపిస్తే .. ఎటువంటి క్లిష్ట పరిస్థితుల నైన అవలీలగా ఎదుర్కొనే మానసిక సామర్ధ్యం పెరుగుతుంది ... ఇటువంటి ఆణిముత్యాన్ని అందించిన  గుణశేఖర్ కు , నిర్మించిన  చౌదరి కు , స్నేహానికి విలువ నిచ్చి  కధ వినకుండా నటించిన రవితేజ కు  తెలుగు సినిమా , తెలుగు జాతి రుణపడి ఉంటుంది .... 


**** నా పిచ్చి నాకు ఆనందం అన్న కాన్సెప్ట్ తో రాసిన ఈ రివ్యూ .. ఎవరిని నొప్పించడానికి కాని , ఎవరిపైనా  ద్వేషం తో కాని రాసినది కాదు అని సవినయంగా మనవిచేసుకుంటున్నాను ... సర్వేజన సుఖినోభవంతు .. 

DHONI - REVIEW ( MY TAKE)

ధోని - నాట్ అవుట్ .... రివ్యూ ...

ప్రకాష్ రాజ్ మొదటి సారి తెలుగు లో  దర్శకుడిగా తీసిన సినిమా అన్న కారణంతో చూసిన సినిమా . హాల్ లో జనాలు లేరు ... సినిమాలో ఐటెం సాంగ్స్ లేవు ... హీరోయిన్ అప్పుడప్పుడూ వచ్చి అడవిమనుషుల బట్టలు వేసుకుని డాన్సు చెయ్యటం లేదు ... ఇరవై  సుమోలు గాలిలోకి లేచి  కిందపడటం లేదు .. ప్రకాష్ రాజ్ వాళ్ళ వంశం కోసం ఒక పంచ్ డైలాగు కూడా చెప్పలేదు . ఎందుకంటే ప్రకాష్ రాజ్ కు  వంశం , కులం , అడ్రస్సు  అన్ని సినిమా కనుక నిజాయితీగా ఒక సినిమాను తీయటానికి ప్రయత్నించాడు . అందులో వంద శాతం గెలిచాడా లేదా అన్న విషయం చెప్పలేక పొవచు కానీ , అతని నిజాయితీ మాత్రం గెలిచింది .

కధ లోకి తొంగిచూస్తే ... ఒక మధ్యతరగతి మనిషి , పెళ్ళాం చనిపోయింది , గవర్నమెంట్  ఆఫీసు లో క్లర్క్ ఉద్యోగం .
చాలని జీతం . పెరుగుతున్న అవసరాలు . నేలాఖరిలో అప్పు . పార్ట్ టైం పచళ్ళు అమ్మటం . ఇద్దరి పిల్లల్ని చక్కగా చదివించి ప్రయోజకుల్ని చెయ్యాలన్న మధ్య తరగతి మనిషి ఆరాటం .  ఆ కలను నెరవేర్చడానికి ఇష్టం లేని క్రికెట్ అంటే ఇష్టం ఉన్న కొడుకు . ఒక్కగానొక్క కొడుకు ఎక్కడ నొచ్చు కుంటాడో అని మెత్తగా సర్దిచేప్పాలని తపన పడే తండ్రి . సబ్జెక్టు లు సరిగ్గా అప్పజెప్పకపోతే ఆ కుర్రవాడు జీవితంలో ఎందుకూ పనికిరాడని ముద్ర వేసే స్కూలు టీచర్లు , ప్రిన్సిపాల్ .  ఒక రోజు కుర్రవాడి విషయం ఒక కొలిక్కి వస్తుంది . వాడు  సరిగ్గా చదవటం లేదని , స్కూల్ నుంచి తీసేస్తామని  ప్రిన్సిపాల్ చెప్తాడు . కోపం తట్టుకోలేని తండ్రి కుర్రాడిని కొడతాడు. తగలరాని  చోట దెబ్బతగిలి ఆ కుర్రాడు కోమా లోకి వెళ్ళిపోతాడు . తరువాత జరిగే  పరిణామాలే కధ .

ప్రకాష్ రాజ్ తన అనుభవంతో , కధను నమ్ముకుని తీసిన సినిమా . మంచి ఆర్టిస్ట్ లను తీసుకుని అందంగా వారిని వాడుకున్నాడు . చదువు అంటే జ్ఞానాన్ని పెంచాలి కానీ , బట్టి పట్టడం కాదు అని చాల రోజులుగా ఎంతో మంది చెప్తూ వస్తున్న ఒక బర్నింగ్ పాయింట్ ను చెప్పటానికి నిజాయితీగా ట్రై చేసాడు . మురళి శర్మ , శ్రీ. గొల్లపూడి మారుతీ రావు , రాధిక ఆమ్టే, ఆకాష్ , నాజర్ వీళ్ళంతా సినిమా కు చాలా బలం.

దేవుడు ఈ సినిమా కు సంగీతం అందించాడు . ఒక పాట కూడా పాడాడు . నేను చెప్తున్నది ఇళయరాజా కోసం . మంచి గిటార్ , పియనో, వాయులీనం  ఉపయోగించి  ఆ మహానుభావుడు ఇచిన  నేపథ్య సంగీతం  ..చాల రోజుల తరువాత చెవులకు అమృతం . గుహన్ కెమేర చక్కగా ఉంది. మధ్య తరగతి కుటుంబీకుడిగా ప్రకాష్ రాజ్ నటన అధ్బుతం . రాధిక ఆమ్టే తన పాత్రలో చక్కగా ఒదిగిపోయింది . ఆ మల్లెల నవ్వుకు  వేయి వందనాలు.

భాయ్ లు, విదేశి లోకేషన్లు , తుపాకులు , తొడలు , బొడ్లు, రక్తం , ఫిలోసఫి ,ఫైట్లు ,పోలియో వచ్చినట్లు వంకర టింకర డాన్సులు , ఇష్టపడే ప్రేక్షకులు మీరైతే ఈ సినిమాకు మీరు వెళ్ళటం పెద్ద బొక్క . సినిమా అనేది ఎమోషన్ ను చూపించే ఒక విద్య గా మీరు భావించే వారైతే  , మీకు ఇంట్లో పిల్లలు ఉన్నట్లయితే  కచితంగా చూడదగిన సినిమా ఇది.

మంచి సినిమాలు కావాలని, కుటుంబంతో కలిసి చూసే సినిమాలు కరువయ్యాయని  F .M రేడియో లలో  వాపోవటం , టీవీ షో ల లోడైరెక్టర్ లను తిట్టటం మానేసి .. ఇలాంటి సినిమాలు చూసి తీసిన వాడికి ఒక నమ్మకం కలిగిస్తే  మంచి సినిమాలు తీయాలని అనుకున్నవారికి ఒక ధైర్యం వస్తుంది .... ఇదంతా ఉట్టిదే ..మన సినిమా లు హాలీవుడ్ రేంజ్ కు తీసుకెళ్ళాలి  అనుకునేవాళ్ళకు నేను చెప్పగలిగిందేమి లేదు ..ఒక పెద్ద నమస్కారం పెట్టడం తప్ప ..

P.S : ఇది నా చిన్న బుర్రకు  ఈ సినిమా ఎలా నచ్చింది అన్నది చెప్పే ప్రయత్నమే తప్ప .. ఎవరిని పొగడాలని కాని, తిట్టాలని కాని ..విమర్శించాలని కానీ అనుకుని రాసినది కాదు. ఇంకా మీకు అలా ఏమైనా అనిపిస్తే  మీ ఇష్టం ...ఉంటాను.. సెలవు 

Business man - Review ( My Take)

ఆ మధ్య ఎవరో ఫ్రెండ్ .. పూరి జగన్నాథ్  అప్పుల్లో ఉన్నాడని , చాల దగ్గరగా  ఉండేవాళ్ళు మోసం చేసి అతని డబ్బంతా కాజేసారని  చెప్పారు . నేను  పెద్దగా పట్టించుకోలేదు . పూరి జగన్నాథ్ నాకు పేస్ బుక్ ఫ్రెండ్ . అతని అప్పు తీర్చే డబ్బు నా దగ్గర లేదు. ఇంకొక కారణం ఏంటంటే .. సినిమా ఫీల్డ్ లో ఇలాంటి రూమర్లు మామూలే .. అని లైట్ తీస్కున్నా.. కానీ ఈ రోజు  బిజినెస్ మాన్  సినిమా చూసాక  అది నిజమేనేమో  అనిపించింది. దగ్గర ఉన్న మనుషులు నమ్మించి గొంతుకొస్తే  ఆ బాధ లోంచి బిజినెస్ మాన్ స్క్రిప్ట్ వచ్చిందేమో  అనిపించింది ..

ఇక సినిమా విషయానికొస్తే ... బాగా మేధావితనంగా , కురసోవా , స్పీల్బర్గ్ , ఇంటర్ నేషనల్  సినిమాలు చూస్తూ తెలుగు సినిమా లో లోపాలను వెతుకుతూ , అన్ని సినిమాలను తిట్టుకునేవాళ్ళు చూడవలసిన సినిమా కాదు ఇది . అన్ని టెన్షన్ లు మర్చిపోవడానికి  సినిమా కు వచ్చే సగటు ప్రేక్షకుడికి  ..మాంచి వర్షం పడుతున్నప్పుడు  దొరికే ఉల్లిపాయ పకోడీ లాంటిది ఈ సినిమా . బాక్స్ ఆఫీసు రికార్డ్స్ బద్దలు కొడుతుందో లేదో తెలీదు కానీ ...సూపర్ హిట్ , కమర్షియల్ హిట్ అవుతుంది అని నా అంచనా ..... కాని తెలుగు  ప్రేక్షకులు  ఒక సినిమాను ఎలా రిసీవ్ చేసుకుంటారో ... పిరమిడ్ పుట్టుక కన్నా పెద్ద మిస్టరీ కాబట్టి ... కొన్నాళ్ళు వేచి చూడాలి ...


ఇక కధ విషయానికొస్తే .... భూమి పుట్టక ముందు నుంచి ఉన్న  పగ, ప్రతీకారం... కుటుంబాన్ని  నాశనం చేసిన విలన్ ను మట్టికరిపించడం అనే పాత ప్రియ పచ్చడి కధ. కాని ఓపెనింగ్ నుంచి ఎక్కడా బోరు కొట్టకుండా ..ఆద్యంతం  రక్తి కట్టించాడు దర్శకుడు .. పూరి జగన్నాథ్ ,  బయటకు కనిపించేటంత  జోవియల్ కాదని ....చాలా వేదాంతం అతని మనసులో ఉందని  ఈ సినిమా డైలాగులు మనకు చెప్తాయి.  మహేష్ బాబు మొత్తం తన భుజాల మీద వేస్కుని సినిమా ను నడిపించాడు .  మనుషుల్లోని హిపోక్రసీ , మనుషుల్లోని  స్వార్ధం చూసి .... వాటివల్ల బాధపడి ..సమాజం తో ఆడుకుని..దాని దూల దీర్చేయ్యాలని కోరుకునే యువకుడు మహేష్ ... ఇక మిగతా కధ వెండి తెరమీద చూడండి .
సినిమాలో బలం ... పూరి జగన్నాథ్  మాటలు, ఒక పర్సనాలిటీ డెవలప్మెంటు పుస్తకం చదువుతున్నట్ట్లుగా ఉంటుంది సినిమా చూస్తుంటే .... చాలా సార్లు మనల్ని మనం చూసుకుంటాం ...అల రాసాడు మాటలు .. ఇక మహేష్ ..చాలా బాగా పలికాడు .. లాజిక్కుల కోసం ఆలోచించడం మానేస్తే  నాజర్ ,  కాజల్  పాత్రలు బాగా కుదిరాయి. కాజల్ ఫ్రెండ్ గా చేసిన అమ్మాయి (ఆంటి కూడా అనుకోవచ్చు) బాగా చేసింది . కెమెరా  చాలా బావుంది . అలీ కామెడీ లేకుండా , అసలు పెద్దగా కామెడి లేకుండా సినిమాను చూపించిన పూరికు హాట్స్ ఆఫ్ ..


తమన్ కు కొద్ది రోజులు రెస్ట్ తీసుకోవటానికి అవకాశం ఇస్తే తను సొంత ట్యూన్లతో మనకు సంగీతం ఇస్తాడు ... రికీ మార్టిన్ , లయన్ కింగ్  థీం సాంగ్ , కొన్ని హిప్ హోప్ పాటలను స్టూడియో లో రుబ్బి మనకు అందించాడు .. ఇక పోతే  రాజ సుందరం కూడా కొద్ది రోజులు మహేష్ బాబు కు డాన్సు కంపోసు చెయ్యకుండా ఉంటె మంచిది ... అవే స్టెప్పులు చూసి చూసి  బోర్ వస్తోంది సార్... 


చాలా సీన్లు పోకిరి ను గుర్తు తెచ్చాయి . హీరోయిన్ చూస్తుండగా హీరో రౌడీ లను కాల్చి చంపటం... ఐటెం సాంగ్ అవుతుండగా ఫోన్ రావటం ..... భాయి , భాయి  అన్న మాఫియా డాన్స్  పేర్లు,  బ్రహ్మ్మాజీ  ను  సరిగ్గా ఉపయోగించుకోకపోవటం .... క్లైమాక్స్  లో ఒక్కసారే సినిమా అయిపోవటం ... చిన్న చిన్న పాయింట్లు ...కానీ సగటు ప్రేక్షకుడికి కావలసిన అన్ని అంశాలు పుష్కలంగా ఉన్నాయి ... దేశంలో కళను ఉద్దరిద్దామనుకుని ఎవడూ సినిమాలను తీయటం లేదు కాబట్టి ... పూరి జగన్నాథ్ దీనిని ఆస్కార్ కు పంపించడు కాబట్టి ... రెండు సార్లు హ్యాపీ గా  చూడవచ్చు .  


మర్చిపోయాను ..... సెన్సార్ వాళ్ళు ఈ సినిమాతో కొత్తగా క్లోజ్ అప్ లో కనిపించే  డాన్సర్లు మరియు హీరోయిన్  అందాలను బ్లర్ చేసి చూపించారు ...తెలుగు సంస్కృతిని కాపాడటానికి వారు చూపించే శ్రద్ధ .... వారి ఇంట్లో వాళ్ళ పిల్లలు  చూసే బూతు వెబ్ సైటులు చూడకుండా చూపిస్తే బావుంటుంది ...అందరికి అన్నీ తెలుసు ఈ రోజుల్లో... 8 వ తరగతి కుర్రాళ్ళు కడుపులు చేస్తున్న ఈ రోజుల్లో వీళ్ళకు ఈ మూలసంక ఎందుకో నాకు అర్ధం కాలేదు ....


మొత్తానికి బిజినెస్ మాన్ బాగా బిజినెస్ చేస్తాడు ....100 % చూడతగిన సామాన్యుడి మూవీ ఇది .... సర్వేజనా సుఖినోభవంతు ... 

naa sodi

రామ్ గోపాల్ వర్మ  బ్లాగ్ లో కలుసుకున్న మిత్రులంతా ఒక చోట చేరి ఎన్నో విషయాలు చర్చించు కుంటూ ఉండగా , నాకు కూడా ఒక బ్లాగ్ ఉండాలని , నేను రాసే పిచ్చి రాతలు అందులో పెడితే బాగుంటుందని ఒక సలహా పడేసిన నా మిత్రుడు మైకీ ఉరఫ్ శివ ప్రసాద్ కు ముందుగా కృతజ్ఞతలు . నా బ్లాగ్ లో నిత్యం టచ్ లో ఉంటారనే నమ్మకంతో నా మిత్రులందరికీ ముందుగానే  అభివందనాలు తెలియ చేసుకుంటున్నాను . ఇందులో ఎం రాయాలనే దాని మీద ఒక స్పష్టత లేనప్పటికీ రోజూ ఏదో ఒకటి రాయాలని మాత్రం అనుకుంటున్నా ...

ఇల్లు గడవటానికి ఏదో ఒకటి చెయ్యాలి కాబట్టి నేను ఏదో బిజినెస్ చేస్తున్నా ! దాని ద్యాసలో పడి టైం దొరక్క సరిగ్గా బ్లాగ్ ను రాయలేనేమో అన్న భయం ఉన్నప్పటికీ ,  రాయటానికి మనస్పూర్తిగా ప్రయత్నిస్తాను . ఫస్ట్ అఫ్ ఆల్  ఒక సినిమా కధను స్క్రీన్ప్లే రూపంలో కామెడీ గా రాయాలని అనుకుంటున్నా ! ఎవరిని నొప్పించే ఉద్దేశ్యం లేకపోయినా , ఇప్పుడొస్తున్న సినిమాలను చూసి కడుపుమండి ఇది రాయాలని అనుకుంటున్నా . దీనిని ఒక సీరియల్ లాగ రోజూ కొంత  బాగం రాద్దామని నా ఆలోచన ....

ఈ సీరియల్ లో పాటలు , ఫైట్స్ , డైలాగులు అన్ని ఉంటాయి ..ఎంజాయ్ చేస్తారని ఆశిస్తున్నా ..

ఇక పోతే మీ సలహాలు, సూచనలు ఎక్కువగా వస్తే నాకు కూడా రాయటానికి ఒక బూస్ట్ అప్ ఉంటుంది..
మరి మీ అభిప్రాయలు తెలియ చేస్తారు కదూ ..

మీ
కరుణా కుమార్